پٹنہ، 20/اکتوبر (ایس او نیوز /ایجنسی) سابق مرکزی وزیر آر سی پی سنگھ نے ہفتے کے روز بی جے پی چھوڑنے کا اعلان کر دیا۔ انہوں نے کہا کہ وہ جلد ہی اپنی سیاسی جماعت قائم کرنے کا ارادہ رکھتے ہیں۔ آر سی پی سنگھ نے مئی 2023 میں بی جے پی میں شمولیت اختیار کی تھی، لیکن اب انہوں نے 'آج تک' کے ساتھ بات چیت میں واضح کیا کہ انہوں نے بی جے پی کی رکنیت کی تجدید نہیں کی ہے، جس سے ان کے ارادے صاف ظاہر ہوتے ہیں۔ انہوں نے کہا، "میں جلد ہی اپنی سیاسی پارٹی کا اعلان کروں گا۔"

جے ڈی یو کے سابق قومی صدر نے گزشتہ ڈیڑھ سال میں بی جے پی میں کوئی اہم ذمہ داری نہیں دیے جانے پر مایوسی کا اظہار کرتے ہوئے کہا "میں نے بی جے پی قیادت سے کہا تھا کہ چونکہ میرے پاس سیاسی تنظیم چلانے کا طویل تجربہ ہے اس لیے انہیں اس کا استعمال پارٹی کے فائدہ کے لیے کرنا چاہیے لیکن بی جے پی کا کام کرنے کا طریقہ الگ ہے اور میں اس کی ستائش کرتا ہوں"۔

ذرائع کے مطابق آر سی پی سنگھ کو نتیش کمار کے عظیم اتحاد میں شامل ہونے کے جواب میں بی جے پی میں شامل کیا گیا تھا لیکن جنوری 2024 میں جب نتیش این ڈی اے میں لوٹ آئے تب سے آر سی پی سنگھ نے خود کو پارٹی میں سیاسی طور سے الگ تھلگ پایا۔ انہیں پارٹی میں کوئی اہمیت نہیں مل رہی تھی جس کے سبب وہ کافی مایوس تھے۔

آر سی پی نے جے ڈی یو میں واپسی کے امکانات کو بھی خارج کر دیا ہے۔ واضح ہو کہ انہوں نے یہیں سے اپنے سیاسی سفر کا آغاز کیا تھا، وہ کبھی نتیش کے کافی قریبی مانے جاتے تھے لیکن جے ڈی یو کو تقسیم کرنے کی کوشش کے الزام میں انہیں 2022 میں پارٹی سے برخاست کر دیا گیا تھا۔

آر سی پی سنگھ نے کہا کہ چونکہ میری اپنی سیاسی طاقت ہے اس لیے جے ڈی یو میں واپسی کی کوئی ضرورت نہیں ہے۔ میرے نتیش کمار کے ساتھ آج بھی اچھے رشتے ہیں، لیکن ہمارے درمیان دوبارہ میل جول کی کوئی کوشش نہیں ہوئی ہے۔